രണ്ടാഴ്ച്ചയ്ക്കുള്ളില് കോവിഡ് വ്യാപനം നിയന്ത്രിക്കാന് സര്ക്കാര്
1 min read![](https://futurekerala.in/wp-content/uploads/2021/04/Future-Kerala-Government-to-control-covid-outbreak-within-two-weeks.png)
- പൊതു, സ്വകാര്യ ചടങ്ങുകള്ക്ക് നിയന്ത്രണം ഏര്പ്പെടുത്തി
- രണ്ട് ദിവസംകൊണ്ട് രണ്ടര ലക്ഷം കോവിഡ് പരിശോധന നടത്തും
- ആശുപത്രി സൗകര്യങ്ങള് വര്ധിപ്പിക്കാനും തീരുമാനം
തിരുവനന്തപുരം: കോവിഡ് കേസുകള് അതിവേഗം കൂടുന്ന പശ്ചാത്തലത്തില് പ്രതിരോധത്തിന് കൂടുതല് നടപടികളുമായി കേരളം. രണ്ടാഴ്ച്ചയ്ക്കുള്ളില് കോവിഡ് വ്യാപനം നിയന്ത്രിക്കാനാണ് സര്ക്കാര് ഉദ്ദേശിക്കുന്നത്. കോവിഡ് കേസുകള് വര്ധിച്ചുവരുന്ന സാഹചര്യത്തില് വ്യാഴാഴ്ച്ച സര്ക്കാര് അടിയന്തര അവലോകന യോഗം വിളിച്ചു.
ഏപ്രില് 16, 17 തിയ്യതികളില് രണ്ടരലക്ഷം പേര്ക്ക് കോവിഡ് പരിശോധന നടത്താന് തീരുമാനിച്ചതായി മുഖ്യമന്ത്രി പിണറായി വിജയന് പറഞ്ഞു.
വ്യാപകമായ പരിശോധന, കര്ശനമായ നിയന്തണം, ഊര്ജിതമായ വാക്സിനേഷന് എന്നീ മൂന്നു തലങ്ങളിലൂടെ കോവിഡ് വ്യാപനം തടയാനാണ് സര്ക്കാര് ഉദ്ദേശിക്കുന്നത്.
വിപുലമായ പരിശോധനയ്ക്കുള്ള സൗകര്യങ്ങള് എല്ലാ ജില്ലകളിലും ഒരുക്കി. ജില്ലകള് തങ്ങള്ക്ക് നിശ്ചയിച്ച ടാര്ഗറ്റ് പൂര്ത്തീകരിക്കണമെന്ന് യോഗത്തില് നിര്ദേശിച്ചു.
തെരഞ്ഞെടുപ്പ് പ്രക്രിയയില് സജീവമായി പങ്കെടുത്ത എല്ലാവരെയും ടെസ്റ്റ് ചെയ്യും. കോവിഡ് മുന്നണി പ്രവര്ത്തകര്, കോവിഡ് വ്യാപനം വളരെ വേഗം നടക്കുന്ന സ്ഥലങ്ങളില് ജീവിക്കുന്നവര്, ധാരാളം ആളുകളുമായി സമ്പര്ക്കം പുലര്ത്തുന്ന പൊതുഗതാഗത മേഖല, ഹോസ്പിറ്റാലിറ്റി, ടൂറിസം മേഖല, ഷോപ്പുകള്, ഹോട്ടലുകള്, മാര്ക്കറ്റുകള്, സേവനകേന്ദ്രങ്ങള് എന്നിവിടങ്ങളില് ജോലി ചെയ്യുന്നവര്, ഡെലിവറി എക്സിക്യൂട്ടീവുകള് മുതലായ ഹൈറിസ്ക് ആളുകളെ കണ്ടെത്തി ടെസ്റ്റ് ചെയ്യും.
ഉയര്ന്ന തോതില് വ്യാപനം നടക്കുന്ന പ്രദശങ്ങളിലും മാര്ക്കറ്റുകളിലും മൊബൈല് ആര്ടിപിസിആര് ടെസ്റ്റിംഗ് യൂണിറ്റുകള് ഉപയോഗപ്പെടുത്തും.
എല്ലാ സര്ക്കാര് വകുപ്പുകളും സഹകരിച്ച് ഏകോപിതമായി കാര്യങ്ങള് നീക്കണമെന്ന് നിര്ദേശിച്ചു. അടുത്ത രണ്ടാഴ്ച ഫലപ്രദമായ നടപടികള് ഇക്കാര്യത്തില് ഉണ്ടാവണം-മുഖ്യമന്ത്രി വ്യക്തമാക്കി.
കണ്ടെന്മെന്റ് സോണുകള് നിര്ണയിക്കുന്നത് കോവിഡ് പരിശോധനയ്ക്ക് തടസ്സമാവുന്ന രീതിയിലാവരുതെന്നും നിര്ദേശമുണ്ട്. പരീക്ഷാ കാലമായതിനാല് വിദ്യാര്ത്ഥികള്ക്ക് ആവശ്യമായ യാത്രാസൗകര്യം ഏര്പ്പെടുത്തണം. വലിയ തിരക്കുള്ള മാളുകള്, മാര്ക്കറ്റുകള് എന്നിവിടങ്ങളില് അതീവ ശ്രദ്ധ പുലര്ത്തണം. അവിടങ്ങളില് ആളുകള് കൂടുന്നത് നിയന്ത്രിക്കണം-സര്ക്കാര് വ്യക്തമാക്കി.
വിവാഹം, ഗൃഹപ്രവേശം ഉള്പ്പെടെയുള്ള പൊതുപരിപാടികള് നടത്തുന്നതിന് നേരത്തെ ഉണ്ടായിരുന്നതുപോലെ മൂന്കൂര് അനുമതി വാങ്ങണം. ഇന്ഡോര് പരിപാടികളില് പങ്കെടുക്കാവുന്നവരുടെ എണ്ണം എഴുപത്തിയഞ്ചായും ഔട്ട്ഡോര് പരിപാടികളില് നൂറ്റമ്പതായും പരിമിതപ്പെടുത്തി.
എല്ലായിടത്തും ശാരീരിക അകലം പാലിക്കുന്നുണ്ടെന്ന് ഉറപ്പാക്കണം. ട്യൂഷന് സെന്ററുകള് രോഗവ്യാപനത്തിനിടയാക്കരുത്. അക്കാര്യം അതത് സ്ഥലത്തെ ആരോഗ്യവകുപ്പും മറ്റും ഉറപ്പാക്കണം. ബോധവല്ക്കരണത്തിന് ഉതകുന്ന സന്ദേശങ്ങള് നല്കാന് മാധ്യമങ്ങള് സ്വമേധയാ തയ്യാറാവണം. ഉത്സവങ്ങളിലും മതപരമായ ചടങ്ങുകളിലും ആള്ക്കാര് കൂടാതെ ശ്രദ്ധിക്കണം. ഇക്കാര്യത്തില് മതനേതാക്കള് സഹകരിക്കുന്നുണ്ട്. ജില്ലാ ഭരണാധികാരികള് അതത് പ്രദേശത്തെ മതനേതാക്കളുമായും വ്യാപാരി വ്യവസായികളെയും വിളിച്ച് സംസാരിക്കണമെന്നും യോഗം നിര്ദേശിച്ചു.