മരംമുറിക്കല്‍ അഴിമതി: സിപിഐ കൂടുതല്‍ പ്രതിരോധത്തിലേക്ക്
തിരുവനന്തപുരം: കഴിഞ്ഞ മാസം 150 കോടി രൂപയുടെ മരം മുറിക്കല്‍ അഴിമതി പുറത്തുവന്നതുമുതല്‍ ഇടതുപക്ഷ സര്‍ക്കാരിലെ രണ്ടാമത്തെ വലിയ സഖ്യകക്ഷിയായ സിപിഐ കൂടുതല്‍ പ്രതിരോധത്തിലായി. കഴിഞ്ഞ പിണറായി സര്‍ക്കാരില്‍ റവന്യൂവകുപ്പ് കൈകാര്യം ചെയ്തിരുന്നത് സിപിഐയുടെ ഇ. ചന്ദ്രശേഖരനാണ്. അദ്ദേഹം കഴിഞ്ഞവര്‍ഷം ഒക്ടോബറില്‍ പുറത്തിറക്കിയ ഉത്തരവിന്‍റെ മറവിലാണ് മരംമുറിക്കല്‍ നടന്നത് എന്നതാണ് ഇതിനുകാരണം. സ്ഥിതിഗതികള്‍ കൂടുതല്‍ വഷളായിക്കൊണ്ടിരിക്കുന്നതിനാല്‍ അന്നത്തെ സംസ്ഥാന റവന്യൂ മന്ത്രി ഇ. ചന്ദ്രശേഖരനെ പോലീസ് അന്വേഷണ സംഘം ചോദ്യം ചെയ്യാനായി വിളിച്ചേക്കാം.
വിവാദമായ ഉത്തരവിന്‍റെ മറവില്‍ കഴിഞ്ഞ വര്‍ഷം ഒക്ടോബറില്‍ വയനാട്ടിലും മറ്റ് എട്ട് ജില്ലകളിലും ഈട്ടി, തേക്ക് എന്നിവയടക്കമുള്ള വന്‍മരങ്ങള്‍ വെട്ടിമാറ്റിയിരുന്നു. ഇതിന്‍റെ രേഖകള്‍ പുറത്തുവന്നതിനെത്തുടര്‍ന്നാണ് സിപിഐ പ്രതിക്കൂട്ടിലായത്.പകര്‍ച്ചവ്യാധിയും ലോക്ക്ഡൗണും കാരണം സംസ്ഥാനം ആകെ ഉപരോധത്തിലിരിക്കെയാണ് മരംമുറിക്കല്‍ നടന്നത്. ജനസഞ്ചാരത്തിന് വിലങ്ങിട്ട കാലയളവില്‍ വിലയേറിയ മരങ്ങളുടെ ലോഡുകള്‍ ഒരിടത്തു നിന്ന് മറ്റൊരിടത്തേക്ക് മാറിക്കൊണ്ടിരുന്നു. എന്താണ് സംഭവിക്കുന്നതെന്ന് ഉത്തരവാദിത്തപ്പെട്ട മറ്റ് ഉദ്യോഗസ്ഥര്‍ അറിഞ്ഞിരുന്നില്ല എന്ന് പറയുന്നു. എന്നാല്‍ ഒരുസംഘം ആള്‍ക്കാരുടെ കൂട്ടായ പ്രവര്‍ത്തനത്തിന്‍റെ ഫലമായാണ് തടികള്‍ വനത്തിന് പുറത്തുള്ള മാര്‍ക്കറ്റിലേക്ക് നീങ്ങിയത്.
തങ്ങള്‍ നട്ടുപിടിപ്പിച്ച മരങ്ങള്‍ വെട്ടിമാറ്റാന്‍ അനുമതി അഭ്യര്‍ത്ഥിച്ചതിനെത്തുടര്‍ന്ന് ചന്ദ്രശേഖരന്‍ 2019 ജൂണ്‍ 27 ന് കട്ടമ്പുഴ വനമേഖലയിലെ കര്‍ഷകരുടെ യോഗം വിളിച്ചുചേര്‍ത്തിരുന്നുവെന്ന് രേഖകള്‍ പറയുന്നു. യോഗത്തില്‍ വനംവകുപ്പ് മരങ്ങള്‍ വെട്ടിമാറ്റുന്നതിനെ എതിര്‍ത്തു. അവകാശം സര്‍ക്കാരിനുമാത്രമാണെന്ന് അവര്‍ ചൂണ്ടിക്കാട്ടി. വനംവകുപ്പിന്‍റെ എതിര്‍പ്പിനെത്തുടര്‍ന്ന് റവന്യൂ വകുപ്പിന്‍റെ അഭിപ്രായം തേടി. 2019 സെപ്റ്റംബര്‍ 3 ന് നടന്ന രണ്ടാമത്തെ യോഗത്തില്‍ ചന്ദനം, റോസ് വുഡ്, തേക്ക് മരം, എബോണി എന്നീ നാല് ഇനങ്ങളുടെ വൃക്ഷങ്ങള്‍ വെട്ടിമാറ്റുന്നതിനെ വനംവകുപ്പ് ശക്തമായി എതിര്‍ത്തു. 1964 ല്‍ കേരള സര്‍ക്കാരിന്‍റെ ലാന്‍ഡ് അസൈന്‍മെന്‍റ് ആക്റ്റ് ഭേദഗതി ചെയ്യാനും ഭൂമിയുടെ ടൈറ്റില്‍ ഡീഡുകള്‍ ലഭിച്ചശേഷം കര്‍ഷകര്‍ നട്ടുപിടിപ്പിച്ച മരങ്ങള്‍ വെട്ടിമാറ്റാനും യോഗം തീരുമാനിച്ചിരുന്നു. ഈ ഘട്ടത്തില്‍ മന്ത്രി ഇടപെട്ട് ലഭ്യമായ രേഖകള്‍ അനുസരിച്ച്, പ്രത്യേക നടപടിക്രമങ്ങള്‍ കൂടിയാലോചിച്ച് നിയമവകുപ്പ് പരിശോധിക്കാതെ ഒരു പ്രത്യേക ഉത്തരവ് പുറപ്പെടുവിക്കുകയായിരുന്നു.
അഴിമതി സംബന്ധിച്ച പ്രതിപക്ഷത്തിന്‍റെ പ്രതിഷേധത്തെത്തുടര്‍ന്ന് കേസ് അന്വേഷിക്കാന്‍ മുഖ്യമന്ത്രി ഒരു പ്രത്യേക പോലീസ് ടീമിനെ നിയോഗിച്ചു. കാര്യങ്ങള്‍ കൂടുതല്‍ എതിര്‍പ്പ് വിളിച്ചുവരുത്തുമ്പോള്‍ ചോദ്യം ചെയ്യലിനായി ചന്ദ്രശേഖരനെ വിളിക്കാനുള്ള എല്ലാ സാധ്യതകളും ഉണ്ട്. അങ്ങനെ സംഭവിച്ചാല്‍, നിയമസഭയുടെ ഒരു പുതിയ സെഷന്‍ ഉടന്‍ ഷെഡ്യൂള്‍ ചെയ്യുന്നതിനാല്‍ കൂടുതല്‍ പ്രതിഷേധത്തിന് വഴിയൊരുക്കും. കഴിഞ്ഞ നിയമസഭാ തെരഞ്ഞെടുപ്പില്‍ മറ്റ് സഹപ്രവര്‍ത്തകരെ മത്സരിക്കാന്‍ പാര്‍ട്ടി അനുവദിക്കാത്തപ്പോള്‍ ചന്ദ്രശേഖരനെ തുടര്‍ച്ചയായ മൂന്നാം തവണയും മത്സരിക്കാന്‍ അനുവദിച്ചത് ഈ കാരണത്താലാണോ എന്ന പ്രതിപക്ഷാരോപണവും നിലനില്‍ക്കുകയാണ്.
