2021ല്‍ ഇന്ത്യയിലെ 5ജി സ്മാര്‍ട്ട്ഫോണ്‍ വിഹിതം 7% മാത്രം
1 min read
2022 അവസാനത്തോടെ ആഗോളതലത്തില്‍ വില്‍ക്കുന്ന ഓരോ രണ്ട് സ്മാര്‍ട്ട്ഫോണുകളിലും ഒന്ന് 5 ജി ആയിരിക്കും
ന്യൂഡെല്‍ഹി: ഇന്ത്യന്‍ വിപണിയില്‍ 5 ജി സ്മാര്‍ട്ട്ഫോണ്‍ വില്‍പ്പനയുടെ വിഹിതം ജനുവരി-മാര്‍ച്ച് കാലയളവില്‍ 7 ശതമാനത്തിലെത്തിയെന്ന് റിയല്‍മിയും കൗണ്ടര്‍പോയിന്‍റ് റിസര്‍ച്ചും സംയുക്തമായി തയാറാക്കിയ റിപ്പോര്‍ട്ടില്‍ പറയുന്നു. 2021 അവസാനത്തോടെ ഇത് 21 ശതമാനത്തിലെത്തുമെന്നാണ് കണക്കാക്കുന്നത്. “വാണിജ്യ ശൃംഖലയിലേക്ക് 5ജി എത്തിയിട്ടാത്ത സാഹചര്യത്തിലും, 5 ജി യോടുള്ള ഇന്ത്യന്‍ ഉപഭോക്താക്കളുടെ അഭിനിവേശം വര്‍ധിച്ചുകൊണ്ടിരിക്കുകയാണ്,” റിപ്പോര്‍ട്ട് പറയുന്നു.
2022ല്‍ ഇന്ത്യ 5 ജി വിപണിയിലെത്തിക്കുകയും ഇന്തോനേഷ്യ വളര്‍ച്ചാ ഘട്ടത്തിലേക്ക് കടക്കുകയും ചെയ്യുന്നതോടെ എന്‍ട്രി-ടു-മിഡ് വിഭാഗങ്ങള്‍ 5ജി ഡിവൈസുകളുടെ വില്‍പ്പനയെ നയിക്കും. .1.6 ബില്ല്യണ്‍ ജനസംഖ്യയുള്ള ഈ ഏഷ്യന്‍ വിപണികള്‍ 5 ജി വില്‍പ്പന വളര്‍ച്ചയെ ദീര്‍ഘകാലത്തേക്ക് നയിക്കും. ഇതില്‍ ഇന്ത്യ പ്രധാന പങ്കുവഹിക്കുമെന്നും റിപ്പോര്‍ട്ടില്‍ പറയുന്നു.
റിപ്പോര്‍ട്ടിലെ നിഗമനം അനുസരിച്ച്, 2022 അവസാനത്തോടെ ആഗോളതലത്തില്‍ വില്‍ക്കുന്ന ഓരോ രണ്ട് സ്മാര്‍ട്ട്ഫോണുകളിലും ഒന്ന് 5 ജി ആയിരിക്കും. ശരാശരി വില്‍പ്പന വില (എഎസ്പി) ഭാവിയില്‍ ഇരട്ട അക്ക ശതമാനം കുറയുന്നത് തുടരാനാണ് സാധ്യത. “കഴിഞ്ഞ രണ്ട് പാദങ്ങളില്‍, വില്‍പ്പന നടന്ന അഞ്ചില്‍ ഒന്ന് 5 ജി സ്മാര്‍ട്ട്ഫോണ്‍ 200 ഡോളര്‍ മുതല്‍ 299 ഡോളര്‍ വരെ വിലയിലുള്ളതാണ്. മൂന്നിലൊന്ന് 5ജി സ്മാര്‍ട്ട് ഫോണുകള്‍ക്ക് 399 ഡോളറോ അതില്‍ കുറവോ ആണ്. വളര്‍ന്നുവരുന്ന വിപണികളില്‍ 5ജി സജീവമാകുന്നതോടെ 100- 199 ഡോളര്‍ നിലവാരത്തില്‍ കൂടുതല്‍ി 5ജ്ഫോണുകള്‍ എത്തും, ‘ റിപ്പോര്‍ട്ടില്‍ പറയുന്നു.
വികസിത വിപണികളായ കൊറിയ, ചൈന, വടക്കേ അമേരിക്ക, യൂറോപ്പ്, ജപ്പാന്‍ എന്നീ രാജ്യങ്ങളില്‍ 5 ജി ഫോണ്‍ വില്‍പ്പന ഇതിനകം 50 ശതമാനം മറികടന്നു. 2021 ആദ്യപാദത്തില്‍ ആഗോളതലത്തില്‍ വിറ്റഴിക്കപ്പെട്ട 5ജി ഡിവൈസുകളില്‍ 86 ശതമാനം വിഹിതവും ഈ വിപണികളിലായാണ്. മൊത്തം സ്മാര്‍ട്ട്ഫോണ്‍ വിപണിയില്‍ ഇവയുടെ മൊത്തം വിഹിതം 53 ശതമാനം ആയിരിക്കുമ്പോഴാണിത്.
“സെല്ലുലാര്‍ സാങ്കേതികവിദ്യയുടെ ഓരോ തലമുറയും വ്യത്യസ്തങ്ങളായ കമ്പനികളാല്‍ നയിക്കപ്പെടുന്നു. 3 ജിയില്‍ ഇത് നോക്കിയ ആയിരുന്നു, സാംസങ് 4 ജിയില്‍ ഏറ്റെടുത്തു. ഞങ്ങള്‍ മുന്നോട്ട് നോക്കുമ്പോള്‍, കളിക്കാരുടെ പട്ടിക കൂടുതല്‍ വൈവിധ്യപൂര്‍ണ്ണമായി വളരുകയാണ്. 5 ജി യുഗത്തില്‍ അതിവേഗം വളരുന്ന ബ്രാന്‍ഡുകളിലൊന്നാണ് റിയല്‍മി, ‘കൗണ്ടര്‍പോയിന്‍റ് റിസര്‍ച്ചിന്‍റെ വിപി & റിസര്‍ച്ച് ഡയറക്ടര്‍ പീറ്റര്‍ റിച്ചാര്‍ഡ്സണ്‍ പറഞ്ഞു.
ഇന്ത്യയില്‍ 5ജി പരീക്ഷണങ്ങള്‍ക്ക് സര്‍ക്കാര്‍ അനുമതി നല്‍കിക്കഴിഞ്ഞു. ചൈനീസ് എക്യുപ്മെന്‍റ് നിര്‍മാതാക്കളെ ഒഴിവാക്കിയാണ് ഇന്ത്യ 5ജി പരീക്ഷണങ്ങളിലേക്ക് നീങ്ങുന്നത്.
