ആഗോള നിക്ഷേപക സംഗമം, സിഐഐയുടെ അസെന്റ് സമ്മിറ്റ് ഫെബ്രുവരിയിൽ
കൊച്ചി: ഫെബ്രുവരി 21, 22 തീയതികളില്‍ കൊച്ചിയില്‍ നടക്കുന്ന ആഗോള നിക്ഷേപക സംഗമത്തിന് മുന്നോടിയായായി അസെന്റ് സമ്മിറ്റ് സംഘടിപ്പിക്കുന്നു. കോണ്‍ഫഡറേഷന്‍ ഓഫ് ഇന്ത്യന്‍ ഇന്‍ഡസ്ട്രി (സിഐഐ) കേരള സ്റ്റേറ്റ് ഇന്‍ഡസ്ട്രിയല്‍ ഡെവലപ്‌മെന്റ് കോര്‍പ്പറേഷനുമായി സഹകരിച്ച് ‘ആങ്കറിങ് ഗ്രോത്ത് ഫ്രം കേരള’ എന്ന വിഷയത്തിലാണ് സമ്മേളനം സംഘടിപ്പിക്കുന്നത്. അസെന്റ് സമ്മിറ്റ് എന്ന പേരില്‍ ഫെബ്രുവരി ഒന്നിന് വൈകുന്നേരം ഹോട്ടല്‍ മണ്‍സൂണ്‍ എംപ്രസില്‍ നടക്കുന്ന പരിപാടിയില്‍ രണ്ട് സെഷനുകളാണ് ഉള്ളത്. വ്യവസായ മന്ത്രി പി. രാജീവ് മുഖ്യാതിഥിയായിരിക്കും. വിജയകഥകളുടെ അവതരണത്തോടെ വൈകിട്ട് 5.30 നാണ് സമ്മേളനം ആരംഭിക്കുന്നത്. തുടര്‍ന്ന് നടക്കുന്ന പാനല്‍ ചര്‍ച്ചയും സംവാദവും വ്യവസായ വാണിജ്യവകുപ്പ് പ്രിന്‍സിപ്പല്‍ സെക്രട്ടറി എപിഎം മുഹമ്മദ് ഹനീഷ് നയിക്കും. ആറ് പ്രശസ്ത സംരംഭകര്‍ തങ്ങളുടെ കരിയര്‍ വളര്‍ച്ച അവതരിപ്പിക്കും. തുടര്‍ന്ന് ‘കേരളത്തില്‍ വളര്‍ന്ന് ആഗോള പാത തെളിയിച്ചവര്‍ ‘ എന്ന പ്രമേയത്തില്‍ ആറ് വിദഗ്ധര്‍ പങ്കെടുക്കുന്ന റൗണ്ട് ടേബിള്‍ ചര്‍ച്ച കെഎസ്‌ഐഡിസി ചെയര്‍മാന്‍ ബാലഗോപാല്‍ ചന്ദ്രശേഖര്‍ നയിക്കും. ഹൈക്കണ്‍ ഇന്ത്യ സിഎംഡി ക്രിസ്റ്റോ ജോര്‍ജ്, നവാള്‍ട്ട് സോളാര്‍ ആന്‍ഡ് ഇലക്ട്രിക് ബോട്ട്‌സ് ഡയറക്ടര്‍ സന്ദിത് അറുമുഖന്‍ തണ്ടശേരി, പോപ്പീസ് ബേബി കെയര്‍ പ്രോഡക്ട്‌സ് സ്ഥാപകനും എംഡിയുമായ ഷാജു തോമസ്, ഏയ്‌സ്‌വെയര്‍ ഫിന്‍ടെക് സര്‍വീസസ് എംഡി നിമിഷ ജെ വടക്കന്‍, സോള്‍വ് പ്ലാസ്റ്റിക് പ്രോഡക്ട്‌സ് എംഡി സുധീര്‍ കുമാര്‍, ട്രാന്‍സ്മിയോ സ്ഥാപകനും സിഇഒ യുമായ സഫില്‍ സണ്ണി തുടങ്ങിയവര്‍ തങ്ങളുടെ വിജയകഥകള്‍ പങ്കുവയ്ക്കും. 6.45 ന് വൈകുന്നേരം നടക്കുന്ന പാനല്‍ ചര്‍ച്ചയില്‍ എസ്എഫ്ഒ ടെക്‌നോളജീസ് (നെസ്റ്റ് ഗ്രൂപ്പ്) സിഎംഡി എന്‍ ജഹാംഗീര്‍, സിഐഐ (സതേണ്‍ റീജിയന്‍) മുന്‍ ചെയര്‍മാന്‍ നവാസ് മീരാന്‍ (ഈസ്റ്റേണ്‍ ട്രെഡ്‌സ് ലിമിറ്റഡ്), സിന്തൈറ്റ് ഇന്‍ഡസ്ട്രീസ് എംഡി അജു ജേക്കബ്, വികെസി ഫുട്ഗിയര്‍ സിഎംഡി വികെസി റസാഖ്, പീകെ സ്റ്റീല്‍ കാസ്റ്റിംഗ്‌സ് ജോയിന്റ് എംഡി കെ ഇ ഷാവാസ്, വൈറ്റല്‍ കാഷ്യൂ ഇന്‍ഡസ്ട്രീസ് എംഡി സന്തോഷ് കാമത്ത് തുടങ്ങിയവര്‍ പങ്കെടുക്കും. സിഐഐ കേരള ചെയര്‍മാന്‍ വിനോദ് മഞ്ഞില (മഞ്ഞിലാസ് ഫുഡ് ടെക്) സ്വാഗതവും ഫെഡറല്‍ ബാങ്ക് എക്‌സിക്യുട്ടീവ് ഡയറക്ടറും ബിസിനസ് മേധാവി(റീട്ടെയില്‍)യുമായ ശാലിനി വാര്യര്‍ സമാപന പ്രസംഗവും നടത്തും.
