യുപിഐയിലെ 0.4% എംഡിആർ: വ്യാപാരികളും ഉപഭോക്താക്കളും അറിയേണ്ട യഥാർത്ഥ വസ്തുതകൾ

ഡിജിറ്റൽ ഇടപാടുകളിൽ ഏർപ്പെടുത്തിയ പുതിയ എംഡിആർ (Merchant Discount Rate) നിരക്കുകളെക്കുറിച്ച് പരക്കുന്ന പ്രചാരണങ്ങളിലും ആശങ്കകളിലും വ്യക്തത വരുത്താൻ കേന്ദ്ര ധനകാര്യ മന്ത്രാലയവും എൻപിസിഐയും വിവരങ്ങൾ പുറത്തുവിട്ടു. യുപിഐ (UPI) ഇടപാടുകൾക്ക് ഫീസ് ചുമത്തുന്നുവെന്ന വാർത്തകൾ സാധാരണക്കാരെയും ചെറുകിട വ്യാപാരികളെയും ഒരുപോലെ ആശങ്കയിലാഴ്ത്തിയിരുന്നു. എന്നാൽ ഈ പരിഷ്കാരം സാധാരണക്കാരുടെ ദൈനംദിന ഉപയോഗത്തെയോ വ്യക്തിഗത പണമിടപാടുകളെയോ ബാധിക്കില്ല.

പി2പി (P2P) ഇടപാടുകൾ പൂർണ്ണമായും സൗജന്യം

വ്യക്തികൾ തമ്മിലുള്ള പണമിടപാടുകളെ (Person-to-Person / P2P) എംഡിആർ നിരക്കുകൾ ബാധിക്കില്ല. സുഹൃത്തുക്കൾക്കോ ബന്ധുക്കൾക്കോ ബന്ധപ്പെട്ട മറ്റാളുകൾക്കോ ₹5,000, ₹50,000 അല്ലെങ്കിൽ അതിൽ കൂടുതൽ തുക അയച്ചാലും യാതൊരുവിധ അധിക നിരക്കും ഈടാക്കില്ല. P2P ഇടപാടുകൾ പൂർണ്ണമായും സൗജന്യമായി തന്നെ തുടരും.

വ്യാപാരികൾക്കുള്ള ഇടപാടുകളും (P2M) 2,000 രൂപ പരിധിയും

പുതിയ എംഡിആർ നിർദ്ദേശം വ്യക്തികൾ വ്യാപാരികൾക്ക് നൽകുന്ന (Person-to-Merchant / P2M) ചില പ്രത്യേക ഇടപാടുകൾക്ക് മാത്രമാണ് ബാധകമാകുന്നത്.

• ₹2,000 വരെയുള്ള ഇടപാടുകൾ: ₹2,000 വരെയുള്ള മർച്ചന്റ് ഇടപാടുകൾ പൂർണ്ണമായും പൂജ്യം (Zero) എംഡിആർ പരിധിയിലാണ് തുടരുന്നത്. ധനകാര്യ മന്ത്രാലയത്തിന്റെ കണക്കുകൾ പ്രകാരം രാജ്യത്തെ മർച്ചന്റ് ഇടപാടുകളുടെ 96 ശതമാനവും ₹2,000-ൽ താഴെയുള്ളവയാണ്. വ്യാപാരിക്ക് ലഭിക്കുന്ന ശരാശരി P2M ഇടപാട് തുക ₹577 മാത്രമായതിനാൽ സാധാരണക്കാരുടെ ദൈനംദിന പർച്ചേസുകളെ ഇത് ബാധിക്കില്ല.

• ₹2,000-ന് മുകളിലുള്ള ഇടപാടുകൾ: നിർദ്ദിഷ്ട മേഖലകളിൽ ₹2,000-ന് മുകളിലുള്ള ഇടപാടുകൾക്കാണ് 0.4% എംഡിആർ ഈടാക്കുന്നത്.

എംഡിആർ കണക്കാക്കുന്ന രീതിയും ക്യാപ്പിങ് പരിധിയും

₹2,000-ന് മുകളിലുള്ള മർച്ചന്റ് ഇടപാടുകളിൽ ബാധകമാകുന്ന ഫീസ് ഘടന താഴെ പറയുന്ന വിധത്തിലാണ്:

• ₹3,000 നൽകുമ്പോൾ: വ്യാപാരിക്ക് വരുന്നത് 0.4% എംഡിആർ, അതായത് ₹12.

• ₹5,000 നൽകുമ്പോൾ: എംഡിആർ തുക ₹20.

• ₹10,000 നൽകുമ്പോൾ: എംഡിആർ തുക ₹40.

• എംഡിആർ ക്യാപ്പിങ് (Upper Limit): ₹75,000 അല്ലെങ്കിൽ അതിനു മുകളിലുള്ള എത്ര വലിയ തുകയുടെ ഇടപാടുകൾക്കും എംഡിആർ പരമാവധി ₹300 ആയി നിജപ്പെടുത്തിയിരിക്കുന്നു. ഇതിനു മുകളിലേക്ക് തുക ആനുപാതികമായി വർദ്ധിക്കില്ല.

എംഡിആർ ഈടാക്കുന്നത് ആരിൽ നിന്ന്?

എംഡിആർ എന്നത് ഉപഭോക്താവിൽ നിന്ന് നേരിട്ട് പിരിച്ചെടുക്കുന്ന പണമിടപാട് ഫീസോ നികുതിയോ അല്ല. മറിച്ച്, ഡിജിറ്റൽ പേയ്മെന്റ് സ്വീകരിക്കുന്നതിന് വ്യാപാരി തങ്ങൾക്ക് ലഭിക്കുന്ന തുകയിൽ നിന്ന് ബാങ്കുകൾക്കും പേയ്മെന്റ് നെറ്റ്‌വർക്കുകൾക്കുമായി നൽകുന്ന പ്രോസസിങ് ചാർജ്ജ് ആണ്. ഇത് സർക്കാരോ എന്പിസിഐയോ പിരിച്ചെടുക്കുന്ന നികുതിയുമല്ല. കൂടാതെ വ്യാപാരിക്ക് ലഭിക്കുന്ന തുകയിൽ നിന്നാണ് ഇത് കുറയ്ക്കുന്നത്.

ചെറുകിട വ്യാപാരികൾക്കും പ്രത്യേക മേഖലകൾക്കും ഇളവുകൾ

• ചെറുകിട വ്യാപാരികൾ: യുപിഐ കിയുആർ (UPI QR) വഴി മാസം ₹1 ലക്ഷം വരെ സ്വീകരിക്കുന്ന ചെറുകിട വ്യാപാരികൾ (P2PM വിഭാഗം) തുടർന്നും പൂജ്യം എംഡിആർ ആനുകൂല്യം ആസ്വദിക്കും.

• പ്രത്യേക സേവന മേഖലകൾ: റെയിൽവേ, ടെലികോം, ഇൻഷുറൻസ്, ഇന്ധനം (Fuel), കാർഷിക ഉൽപ്പന്നങ്ങൾ എന്നീ മേഖലകളിൽ ₹2,000-ന് മുകളിലുള്ള ഇടപാടുകൾക്ക് 0.4%-ന് പകരം കേവലം ₹5 ഫ്ലാറ്റ് നിരക്ക് മാത്രമാണ് വരുന്നത്.

• മ്യൂച്വൽ ഫണ്ടും സെക്യൂരിറ്റീസും: മ്യൂച്വൽ ഫണ്ടുകൾ, സെക്യൂരിറ്റീസ്, സ്റ്റോക്ക് ബ്രോക്കർമാർ എന്നിവർക്കുള്ള ഇടപാടുകളിൽ നിരക്ക് 0.02% മാത്രമാണ് (പരമാവധി ₹300).

എന്തുകൊണ്ട് ഈ പരിഷ്കാരം?

സാധാരണക്കാർക്ക് യുപിഐ സൌജന്യമായി നിലനിർത്താൻ സർക്കാർ പൊതു ധനസഹായം നൽകിവരുന്നുണ്ടായിരുന്നു. ഉദാഹരണത്തിന് 2025 മാർച്ച് മാസം കുറഞ്ഞ തുകയുടെ P2M ഇടപാടുകൾ സൗജന്യമായി നിലനിർത്താൻ ₹1,500 കോടിയുടെ ഇൻസെന്റീവ് പദ്ധതിക്ക് സർക്കാർ അംഗീകാരം നൽകിയിരുന്നു. എന്നാൽ യുപിഐ ശൃംഖലയുടെ തുടർച്ചയായ വികസനത്തിനും സുഗമമായ പ്രവർത്തനത്തിനും അടിസ്ഥാന സൗകര്യ വികസനത്തിനുമായി ഒരു സാമ്പത്തിക സ്രോതസ്സ് അത്യന്താപേക്ഷിതമാണ്.

സാധാരണക്കാരുടെയും ചെറുകിട കച്ചവടക്കാരുടെയും ദൈനംദിന പണമിടപാടുകളെ പൂർണ്ണമായും സംരക്ഷിച്ചുകൊണ്ട് വലിയ വാണിജ്യ ഇടപാടുകളിൽ മാത്രം നിശ്ചിത നിരക്ക് നിശ്ചയിക്കുകയാണ് ഇതിലൂടെ മന്ത്രാലയം ചെയ്യുന്നത്.