ഒക്ടാകോര്‍ 5ജി പ്രോസസറുമായി ഷവോമി റെഡ്മി 15എ 5ജി

കൊച്ചി: ഷവോമി ഇന്ത്യ തങ്ങളുടെ പുതിയ സ്മാര്‍ട്ട്ഫോണായ റെഡ്മി 15എ5ജി വിപണിയില്‍ അവതരിപ്പിച്ചു. മികച്ച പ്രകടനവും ദീര്‍ഘകാലം നില്‍ക്കുന്ന ബാറ്ററിയും ലക്ഷ്യമിട്ട്, ദൈനംദിന ഉപയോഗങ്ങള്‍ സുഗമമാക്കുന്ന രീതിയിലാണ് ഈ ഫോണ്‍ രൂപകല്‍പ്പന ചെയ്തിരിക്കുന്നത്. കരുത്തുറ്റ ഒക്ടാകോര്‍ 5ജി പ്രോസസറാണ് ഫോണിന് കരുത്തേകുന്നത്. കൂടാതെ ഡ്യുവല്‍-ബാന്‍ഡ് വൈഫൈ, ബ്ലൂടൂത്ത് 5.4 എന്നീ മികച്ച കണക്ടിവിറ്റി ഫീച്ചറുകളും ഇതിലുണ്ട്. 120ഹെര്‍ഡ്‌സ് റിഫ്രഷ് റേറ്റ് പിന്തുണയുള്ള 6.9 ഇഞ്ച് വലിയ ഡിസ്പ്ലേയാണ് ഫോണിന്റെ പ്രധാന ആകര്‍ഷണം. 800 നിറ്റ്‌സ് വരെ ബ്രൈറ്റ്നസ്, നനഞ്ഞ കൈകള്‍കൊണ്ടും ഉപയോഗിക്കാന്‍ സഹായിക്കുന്ന വെറ്റ് ടച്ച് ടെക്‌നോളജി 2.0, കണ്ണിന്റെ ആയാസം കുറയ്ക്കാനുള്ള ടിയുവി സര്‍ട്ടിഫിക്കേഷനുകള്‍ എന്നിവയും ഈ ഡിസ്പ്ലേയുടെ സവിശേഷതകളാണ്. ഒറ്റ ചാര്‍ജില്‍ രണ്ട് ദിവസം വരെ നീണ്ടുനില്‍ക്കുന്ന 6300 എംഎഎച്ച് വലിയ ബാറ്ററിയാണ് ഫോണിലുള്ളത്. 15വാട്ട് ചാര്‍ജിംഗിനൊപ്പം 7.5വാട്ട് വയര്‍ഡ് റിവേഴ്‌സ് ചാര്‍ജിംഗ് സൗകര്യവും ഇത് പിന്തുണയ്ക്കുന്നു. ഫോട്ടോഗ്രാഫിക്കായി 32എംപി എഐ ഡ്യുവല്‍ റിയര്‍ ക്യാമറയും വീഡിയോ കോളുകള്‍ക്കും മറ്റുമായി 8എംപി ഫ്രണ്ട് ക്യാമറയും നല്‍കിയിട്ടുണ്ട്. 200% വോളിയം ബൂസ്റ്റ് നല്‍കുന്ന ശബ്ദ സംവിധാനം, ഐപി 52 ഡ്യൂറബിലിറ്റി റേറ്റിംഗ്, ഫിംഗര്‍പ്രിന്റ് സ്‌കാനര്‍, 2ടിബി വരെ വര്‍ദ്ധിപ്പിക്കാവുന്ന സ്റ്റോറേജ് എന്നിവയാണ് മറ്റ് പ്രത്യേകതകള്‍. ആന്‍ഡ്രോയിഡ് 16 അടിസ്ഥാനമാക്കിയുള്ള ഹൈപ്പര്‍ ഒഎസ് 3.0-ല്‍ പ്രവര്‍ത്തിക്കുന്ന ഈ ഫോണിന് 4 വര്‍ഷത്തെ ആന്‍ഡ്രോയിഡ് അപ്ഡേറ്റുകളും 6 വര്‍ഷത്തെ സുരക്ഷാ അപ്ഡേറ്റുകളും ഷവോമി ഉറപ്പുനല്‍കുന്നു. റെഡ്മി 15എ5ജി ഫോണിന്റെ അടിസ്ഥാന മോഡലായ 4ജിബി റാം + 64ജിബി സ്റ്റോറേജ് വേരിയന്റിന് 12,999 രൂപയാണ് വില. 4ജിബി + 128 ജിബി മോഡലിന് 14,499 രൂപയും, ഉയര്‍ന്ന മോഡലായ 6ജിബി + 128ജിബി വേരിയന്റിന് 16,499 രൂപയുമാണ് വില. ഈ സ്മാര്‍ട്ട്ഫോണ്‍ ഏപ്രില്‍ 3 മുതല്‍ ഫ്‌ലിപ്പ്കാര്‍ട്ട്, മി.കോം,ഷവോമിയുടെ മറ്റ് അംഗീകൃത റീട്ടെയില്‍ സ്റ്റോറുകള്‍ എന്നിവ വഴി ഉപഭോക്താക്കള്‍ക്ക് വാങ്ങാന്‍ സാധിക്കും.