ഡിഡബ്ല്യുഎസിന്‍റെ ഏറ്റെടുക്കല്‍ പൂര്‍ത്തിയാക്കിയെന്ന് എച്ച്സിഎല്‍ ടെക്നോളജീസ്
ഓസ്‌ട്രേലിയൻ ഐടി സൊല്യൂഷൻസ് കമ്പനിയായ ഡിഡബ്ല്യുഎസിന്‍റെ ഏറ്റെടുക്കൽ പൂർത്തിയായതായി എച്ച്സിഎൽ ടെക്നോളജീസ് അറിയിച്ചു. ഓസ്‌ട്രേലിയയിലും ന്യൂസിലാന്‍റിലും വിപണിയിൽ സ്ഥാനം ഉറപ്പിക്കാൻ ഇന്ത്യൻ കമ്പനിയെ സഹായിക്കുന്ന നീക്കമാണിത്. ഡി‌ഡബ്ല്യുഎസ് ഏറ്റെടുക്കുമെന്ന് എച്ച്സിഎൽ ടെക്നോളജീസ് കഴിഞ്ഞ സെപ്റ്റംബറിലാണ് പ്രഖ്യാപിച്ചത്.
2021 ജനുവരി 5 മുതൽ ഡി‌ഡബ്ല്യുഎസ് ഏറ്റെടുക്കൽ കമ്പനി പൂർത്തിയാക്കിയതായി റെഗുലേറ്ററി ഫയലിംഗിൽ എച്ച്സിഎൽ ടെക്നോളജീസ് അറിയിച്ചു. മൊത്തം ഓഹരി മൂല്യം 158.2 ദശലക്ഷം ഓസ്‌ട്രേലിയൻ ഡോളർ (ഏകദേശം 850.33 കോടി രൂപ) ആയി കണക്കാക്കിയാണ് ഇടപാടെന്ന് എച്ച്സിഎൽ ടെക്നോളജീസ് സെപ്റ്റംബറിൽ വ്യക്തമാക്കിയിരുന്നു.
