തമിഴ്നാട് സംസ്ഥാനത്തെ കേന്ദ്രസര്‍ക്കാര്‍ ജോലികള്‍ പ്രദേശവാസികള്‍ക്ക് നല്‍കണം
ചെന്നൈ: തമിഴ്നാട്ടിലെ കേന്ദ്രസര്‍ക്കാര്‍ ജോലികള്‍ പ്രദേശവാസികളിലേക്ക് എത്തണമെന്ന് പട്ടാളി മക്കള്‍ കച്ചി (പിഎംകെ) സ്ഥാപക നേതാവ് ഡോ. എസ്. രാംദോസ് പറഞ്ഞു. സതേണ്‍ റെയില്‍വേയിലെയും മറ്റ് പൊതുമേഖലാ സ്ഥാപനങ്ങളിലെയും ജോലികള്‍ക്ക് തമിഴരെ അവഗണിക്കുകയാണെന്ന് മുതിര്‍ന്ന നേതാവ് തിങ്കളാഴ്ച പ്രസ്താവനയില്‍ പറഞ്ഞു. ഈ വകുപ്പുകളിലെ ഓഫീസര്‍ ലെവല്‍ ജോലികളില്‍ 50 ശതമാനവും പ്രദേശവാസികള്‍ക്ക് മാത്രം നല്‍കണം. അതിനനുസരിച്ച് നിയമങ്ങളില്‍ ഭേദഗതി വരുത്താന്‍ കേന്ദ്ര സര്‍ക്കാരിനോട് ആവശ്യപ്പെടണം. ഇക്കാര്യങ്ങളില്‍ കേന്ദ്രസര്‍ക്കാരിന് വേണ്ട സഹായം നല്‍കണമെന്നും അദ്ദേഹം തമിഴ്നാട് സര്‍ക്കാരിനോട് ആവശ്യപ്പെട്ടു.
ദക്ഷിണ റെയില്‍വേയിലെ ഭൂരിപക്ഷം ജോലികളും ഉത്തരേന്ത്യന്‍ ജനത പിടിച്ചെടുക്കുന്നുണ്ടെന്നാണ് പിഎംകെ വാദിക്കുന്നത്. തമിഴ്നാട്ടിലെ കേന്ദ്ര സര്‍ക്കാര്‍ സ്ഥാപനങ്ങളിലെ ജോലികള്‍ മറ്റ് സംസ്ഥാനങ്ങളില്‍ നിന്നുള്ള ആളുകള്‍ക്ക് എങ്ങനെ പോകുന്നുവെന്നത് ഒരു നിഗൂഢതയാണെന്നും അദ്ദേഹം പറഞ്ഞു.കേന്ദ്ര പൊതുമേഖലാ സ്ഥാപനങ്ങള്‍ക്കുള്ള അടിസ്ഥാന സൗകര്യങ്ങള്‍ സംസ്ഥാന സര്‍ക്കാര്‍ നല്‍കിയിട്ടുണ്ട്. ഇത് നല്‍കിയിട്ടും കേന്ദ്ര ജോലികളില്‍ നാട്ടുകാര്‍ക്ക് സംവരണം ഏര്‍പ്പെടുത്തിയിട്ടില്ല. ഇത് മാറ്റി ഉടന്‍ പരിഹരിക്കണമെന്ന് രാംദോസ് പറഞ്ഞു.
