ടിവിഎസ് ഇന്റലിഗോ അവതരിപ്പിച്ചു
1 min read
പുതിയ സാങ്കേതികവിദ്യ നല്‍കിയ ടിവിഎസ് ജൂപ്പിറ്റര്‍ വിപണിയിലെത്തിച്ചു
ഹൊസൂര്‍: ടിവിഎസ് മോട്ടോര്‍ കമ്പനി പുതുതായി ‘ഇന്റലിഗോ’ സാങ്കേതികവിദ്യ അവതരിപ്പിച്ചു. ഈ സാങ്കേതികവിദ്യ നല്‍കിയ ടിവിഎസ് ജൂപ്പിറ്റര്‍ വിപണിയിലെത്തിച്ചു. ഏതാനും സെക്കന്‍ഡുകള്‍ ഐഡില്‍ ആയിരുന്നാല്‍ എന്‍ജിന്‍ ഓഫാകുന്നതാണ് ടിവിഎസ് ഇന്റലിഗോ. മാത്രമല്ല, ത്രോട്ടില്‍ അല്‍പ്പമൊന്ന് തിരിച്ചാല്‍ എന്‍ജിന്‍ വീണ്ടും പ്രവര്‍ത്തിച്ചുതുടങ്ങും.
ഹീറോ, ഹോണ്ട എന്നീ ബ്രാന്‍ഡുകളുടെ ഇരുചക്രവാഹനങ്ങളില്‍ ഈ സാങ്കേതികവിദ്യ മറ്റ് പേരുകളില്‍ നിലവിലുണ്ട്. ട്രാഫിക് സിഗ്നലുകളില്‍ കാത്തുകിടക്കുമ്പോഴും മറ്റും ഇന്ധനം ലാഭിക്കാന്‍ ഉപയോക്താക്കളെ സഹായിക്കുന്നതാണ് ഇത്തരം സാങ്കേതികവിദ്യകള്‍.
തല്‍ക്കാലം, 110 സിസി സ്‌കൂട്ടറിന്റെ സെഡ്എക്‌സ് ഡിസ്‌ക് വേരിയന്റില്‍ മാത്രമാണ് ഇന്റലിഗോ നല്‍കിയിരിക്കുന്നത്. പുതിയ ഫീച്ചര്‍ നല്‍കിയപ്പോഴും സ്‌കൂട്ടറിന്റെ വിലയില്‍ മാറ്റം വരുത്തിയിട്ടില്ല. 72,347 രൂപയാണ് ഡെല്‍ഹി എക്‌സ് ഷോറൂം വില. ഇതോടെ ഓട്ടോമാറ്റിക് സ്റ്റാര്‍ട്ട്-സ്‌റ്റോപ്പ് സവിശേഷതയോടെ വരുന്ന ഇന്ത്യയിലെ ഒരേയൊരു 110 സിസി സ്‌കൂട്ടറായി ടിവിഎസ് ജൂപ്പിറ്റര്‍ മാറി.
