ലംബ വിക്ഷേപണം നടത്താവുന്ന ഹ്രസ്വദൂര ഉപരിതല-വ്യോമ മിസൈല് ഇന്ത്യ വിജയകരമായി പരീക്ഷിച്ചു
ന്യൂ ഡല്ഹി: ലംബ വിക്ഷേപണം നടത്താവുന്ന ഹ്രസ്വദൂര ഉപരിതല-വ്യോമ മിസൈല് (Vertical Launch Short Range Surface to Air Missile – VL-SRSAM) 2022 ജൂണ് 24 ന് DRDO യും ഇന്ത്യന് നാവികസേനയും ചേര്ന്ന് ഒഡീഷ തീരത്തെ ചാന്ദിപൂരിലെ ഇന്റഗ്രേറ്റഡ് ടെസ്റ്റ് റേഞ്ചില് (ITR) വിജയകരമായി പരീക്ഷിച്ചു. കപ്പലില് സ്ഥാപിതമായ VL-SRSAM ആയുധ സംവിധാനം സമീപപരിധിയിലുള്ള വിവിധ ആകാശ ഭീഷണികളെ നിര്വീര്യമാക്കാന് ശേഷിയുള്ളതാണ്.
വിമാനത്തിന് സമാനമായ ഒരു അതിവേഗ വ്യോമ ലക്ഷ്യത്തിനെതിരെ വിക്ഷേപിച്ചാണ് ഈ സംവിധാനം പരീക്ഷിച്ചത്. പരീക്ഷണം പൂര്ണ്ണ വിജയമായിരുന്നു. ചാന്ദിപൂര് ITR വിന്യസിച്ചിട്ടുള്ള നിരവധി നിരീക്ഷണ ഉപകരണങ്ങള് ഉപയോഗിച്ച് വാഹനത്തിന്റെ ആകാശ പാതയും പ്രവര്ത്തന മേന്മയും നിരീക്ഷിച്ചു.
പരീക്ഷണ വിക്ഷേപണത്തിന്റെ വിജയത്തില് DRDO യെയും ഇന്ത്യന് നാവികസേനയെയും വ്യവസായമേഖലയെയും രാജ്യ രക്ഷാമന്ത്രി ശ്രീ രാജ്നാഥ് സിംഗ് അഭിനന്ദിക്കുകയും വ്യോമ ഭീഷണികള്ക്കെതിരെ ഇന്ത്യന് നാവികസേനയുടെ കപ്പലുകളുടെ പ്രതിരോധ ശേഷി വര്ദ്ധിപ്പിക്കുന്ന ഒരു കവചമായി ഈ സംവിധാനം മാറുമെന്നു പ്രസ്താവിക്കുകയും ചെയ്തു.
