വനിതാ-ശിശുവികസന വകുപ്പ് രൂപീകരിക്കും

വനിതാ-ശിശുവികസന വകുപ്പ് രൂപീകരിക്കും

ലോക്‌നാഥ് ബെഹ്‌റ വീണ്ടും ഡിജിപിയാകും

തിരുവനന്തപുരം: സംസ്ഥാനത്ത് വനിതാ-ശിശുവികസന വകുപ്പ് രൂപീകരിക്കാന്‍ മന്ത്രിസഭ തീരുമാനിച്ചു. സാമൂഹ്യനീതി വകുപ്പ് വിഭജിച്ചുകൊണ്ടാണ് പുതിയ വകുപ്പ് രൂപീകരിക്കുന്നത്. വികസന പ്രവര്‍ത്തനത്തില്‍ സ്ത്രീകള്‍ക്ക് തുല്യപങ്കാളിത്തം ലഭിക്കുന്നതിനും ലിംഗവിവേചനത്തില്‍ നിന്നും അതിക്രമങ്ങളില്‍നിന്നും സംരക്ഷണം ലഭിക്കുന്നതിനും കുട്ടികളുടെ അവകാശസംരക്ഷണത്തിനും പ്രത്യേക വകുപ്പ് വേണമെന്ന ആവശ്യം പരിഗണിച്ചാണ് പുതിയ വകുപ്പ് രൂപീകരിക്കുന്നത്. എല്‍ഡിഎഫ് പ്രകടനപത്രികയില്‍ വകുപ്പ് രൂപീകരണം വാഗ്ദാനം ചെയ്തിരുന്നു. 2016ലെ നയപ്രഖ്യാപനത്തിലും പുതിയ വകുപ്പ് രൂപീകരിക്കുമെന്ന് സര്‍ക്കാര്‍ ഉറപ്പുനല്‍കിയിരുന്നു. ജന്‍ഡര്‍ ഓഡിറ്റിംഗ്, മറ്റ് വകുപ്പുകളിലെ സ്ത്രീകളുമായി ബന്ധപ്പെട്ട പദ്ധതികളുടെ ഏകോപനം എന്നിവ പുതിയ വകുപ്പിന്റെ ചുമതലകളില്‍ വരും.

വനിതാ-ശിശുവികസന വകുപ്പ് രൂപീകരിക്കുന്നതിനെക്കുറിച്ച് പഠിക്കാന്‍ സാമൂഹ്യനീതി വകുപ്പിന്റെ മുന്‍ ഡയറക്റ്റര്‍ വിഎന്‍ ജിതേന്ദ്രനെ സര്‍ക്കാര്‍ നിയോഗിച്ചിരുന്നു. അദ്ദേഹത്തിന്റെ ശുപാര്‍ശകളുടെ അടിസ്ഥാനത്തിലാണ് പുതിയ വകുപ്പിന്റെ ചുമതലകള്‍ നിര്‍ണയിച്ചത്. സ്ത്രീകളുടെയും കുട്ടികളുടെയും സംരക്ഷണം, പരിചരണം, ക്ഷേമം, വികസനം, പുനഃരധിവാസം, ശാക്തീകരണം തുടങ്ങിയ വിഷയങ്ങള്‍ പുതിയ വകുപ്പിന്റെ നിയന്ത്രണത്തിലായിരിക്കും. വനിതാ കമ്മീഷന്‍, ബാലാവകാശ കമ്മീഷന്‍, ജന്‍ഡര്‍ പാര്‍ക്ക്, നിര്‍ഭയ പദ്ധതി, ശിശുക്ഷേമ സമിതി, അങ്കണവാടി ക്ഷേമനിധി ബോര്‍ഡ്, അഗതി മന്ദിരങ്ങള്‍ മുതലായ സ്ഥാപനങ്ങളും പദ്ധതികളും പുതിയ വകുപ്പിന്റെ കീഴില്‍ വരും.

പുതിയ വകുപ്പിന് ആവശ്യമായ തസ്തികകള്‍ സൃഷ്ടിക്കാനും മന്ത്രിസഭ തീരുമാനിച്ചു. ഡയറക്റ്റര്‍, 14 ജില്ലാ ഓഫീസര്‍മാര്‍, ലോ ഓഫീസര്‍, അഡ്മിനിസ്‌റ്റ്രേറ്റീവ് ഓഫീസര്‍ എന്നിവര്‍ക്കു പുറമെ കോണ്‍ഫിഡന്‍ഷ്യല്‍ അസിസ്റ്റന്റ് ഉള്‍പ്പെടെയുളള സപ്പോര്‍ടിങ്ങ് സ്റ്റാഫിനെയും നിയമിക്കും. ജില്ലാതലത്തിലേക്ക് ആവശ്യമായ ഉദ്യോഗസ്ഥരെ മറ്റു വകുപ്പുകളില്‍നിന്ന് പുനര്‍വിന്യസിക്കും.

സംസ്ഥാന പോലീസ് മേധാവിയായി ലോക്‌നാഥ് ബെഹ്‌റയെ നിയമിക്കാനും മന്ത്രിസഭ തീരുമാനിച്ചിട്ടുണ്ട്. ചീഫ് സെക്രട്ടറി നളിനി നെറ്റോ അദ്ധ്യക്ഷയായ കമ്മിറ്റിയുടെ ശുപാര്‍ശ പ്രകാരമാണ് നിയമനം. ആഭ്യന്തര അഡീഷണല്‍ ചീഫ് സെക്രട്ടറിയും നിയമവകുപ്പ് സെക്രട്ടറിയും ഈ കമ്മിറ്റിയില്‍ അംഗങ്ങളാണ്. ജൂണ്‍ 27നാണ് കമ്മിറ്റി സര്‍ക്കാരിന് ശുപാര്‍ശ സമര്‍പ്പിച്ചത്. നിലവിലെ ഡിജിപി ടിപി സെന്‍കുമാര്‍ ജൂണ്‍ 30ന് വിരമിക്കുന്ന ഒഴിവിലാണ് നിയമനം. ലോക്‌നാഥ് ബെഹ്‌റ ഇപ്പോള്‍ വിജിലന്‍സ് ഡയറക്റ്ററാണ്.

Comments

comments

Categories: Top Stories, World